Pezullimi i punës në Ferronikel, punëtorët do të protestojnë të enjtën

Ferronikel ditë më parë kishte njoftuar se ka ndalë përkohësisht prodhimin për shkak të çmimit të lartë të energjisë elektrike.

Sipas tyre, rritja e vazhdueshme e çmimit të energjisë elektrike në tregjet evropiane, katërfishimi i çmimit të energjisë ka çuar në marrjen e këtij vendimi që do të zgjasë deri në një moment të dytë kur çmimet të normalizohen.

Lidhur me këtë, nën organizimin e Sindikatës së Pavarur të Punëtorëve, këta punëtorë do të protestojnë para Qeverisë së Kosovës.

“Të enjten ora 11:30 në Prishtinë, nën organizimin e Sindikatës së Pavarur të Punëtorëve, punëtorët e kompanisë ‘NewCo Ferronikeli’ do të protestojnë para Qeverisë së Kosovës. Protesta thirret si pasojë e mungesës së interesimit nga ana e Qeverisë për gjendjen e rreth 1,000 punëtorëve të kompanisë, të cilët që nga 8 tetori janë të papunë. Kërkesë do të jetë trajtimi serioz institucional i kësaj çështjeje për gjetjen e një zgjidhjeje të shpejt”, thuhet në njoftim.