Edhe “Siguria” e Pacollit nën llupën e BQK-së, probleme me kapital

Banka Qendrore e Kosovës

Bordi ekzekutiv i Bankës Qendrore të Kosovës (BQK) të premten e kaluar mori vendim për revokim të licencës të kompanisë së sigurimit “Kosova e Re”. Sipas drejtuesve të BQK-së deri te ky vendim erdhi pasi kompania nuk arriti t’i përmbushë kërkesat ligjore për kapital dhe solvencë. Sipas Sokol Havollit, zëvendësguvernator në BQK, detyrimet e kompanisë në momentin e revokimit të licencës ishin 7.7 milionë euro.

Në bazë të ligjit për sigurimet, kompanitë e sigurimit duhet të mbajnë nivele të caktuara të kapitalit si rezervë, për t’ju përgjigjur detyrimeve në të ardhmen.

Në bazë të raporteve të BQK-së, probleme me kapital ka edhe kompania “Siguria” e cila është në pronësi të Behgjet Pacollit. Sipas raportit të monitorimit të BQK-së për vitin 2020, një kopje të të cilit e ka siguruar Buletini Ekonomik, “Siguria” ka mungesë të kapitalit në shumë prej 4.42 milionë euro dhe mungesë për solvencë 2.81 milionë euro. Kërkesa përfundimtare ndaj kësaj kompanie është 4.42 milionë euro.

Reklama e sponzorizuar

Të dhënat e këtij raporti i kanë konfirmuar nga BQK, në një përgjigje për Buletinin Ekonomik. “KS “Siguria” ka qenë subjekt i masave administrative nga BQK-ja për shkak të mos respektimit të kërkesave ligjore në fuqi dhe përkundër shtimit të kapitalit prej rreth 6 milionë euro dy vitet e fundit, vazhdon të mos jetë në pajtueshmëri të plotë me këto kërkesa”, ka thënë Kushtrim Ahmeti, zëdhënës në BQK.

Sipas tij, BQK ka intensifikuar angazhimin e saj me qëllim që sektori i sigurimeve të jetë në zbatim të plotë të kornizës ligjore në fuqi. Mos zbatimi i kërkesave të tilla nga Siguruesit do të përcillen me masa adekuate administrative, për të gjithë siguruesit, të cilat nuk zbatojnë legjislacionin në fjalë.

Nga kompania “Siguria” nuk kanë kthyer përgjigje deri në momentin e publikimit të shkrimit.

Ndryshe, brenda një periudhe prej tre vjetësh, dy kompani të sigurimit janë mbyllur. Kompania “Insig” dhe tash “Kosova e Re”.

Në të dyja rastet ata që do ta pësojnë më së shumti janë qytetarët, përkatësisht policëmbajtësit që kishin kontrata me këto kompani. Në rastin e kompanisë “Insig” e cila po ashtu ishte mbyllur me 2019 për të njëjtat arsye, policëmbajtësit u dëmtuan për 20 për qind të vlerës së dëmit nga aksidenti që kishin me kompaninë.

Ndërkaq, në rastin e “Kosovës së Re” duhet pritur përfundimi i fazës së likuidimit për të parë se deri në çfarë mase do të mbulohen detyrimet prej 7.7 milionë euro nga asetet e kompanisë.

“Ende nuk e dimë. Mbulueshmëria e detyrimeve mund të jetë më pak ose më shumë se 80%, duhet të presim likuidimin e kompanisë”, pati thënë zëvendësguvernatori Havolli në konferencën ku u njoftua revokimi i licencës. /Buletini Ekonomik/