Gjykata Themelore në Prishtinë ka rivendosur që të pezullojë lejet dhe licencat të tri hidrocentraleve të KELKOS-it në Lumbardhin e Deçanit.
Ky vendim ka ardhur pasi Apeli kishte kthyer lëndën në rivendosje, me arsyetimin se paditësi duhet të dëshmojë interesin e vet për padinë ndaj Ministrisë së Ekonomisë dhe Ambientit dhe Zyrës së Rregullatorit të Energjisë.
Por, Themelorja sërish ka vendosur për pezullimin e licencave. Me këtë aktvendim shtyhet ekzekutimi i lejeve ujore e mjedisore dhe licencave për prodhimin e energjisë, të cilat i kanë lëshuar institucionet vendore për hidrocentralet “Deçani”, “Bellaja” por edhe “Lumbardhi 2”.
“Shtyrja e ekzekutimit vendoset për të parandaluar dëmin e pariparueshëm deri kur të shqyrtohet padia jonë kundër dy organeve vendimmarrëse, Ministria e Ekonomisë dhe Ambientit dhe Zyra e Rregullatorit të Energjisë”, ka bërë të ditur avokati i paditësit Faton Selmanaj, Gatoar Mjeku, pas pranimit të aktvendimit.
Ai ka treguar se me aktvendim të veçantë, Gjykata ka miratuar edhe zgjerimin e dyfishtë të padisë.
“Përveç aktivistit Faton Selmanaj, paditës do jenë dy qytetarë të Deçanit, të cilët po mbrojnë tokën e vet nga veprimtaria e paligjshme e Kelkosit. Kontesti do të përfshijë vendimin e para do ditëve të MEA-s për ta pajisë me leje ujore hidrocentralin e tretë “Lumbardhi II”, ka theksuar ai.
