Parandalimi i përhapjes së varianteve të reja të COVID-19: Kosova në shkurt furnizohet me vetëm 3 për qind të vaksinave

Institucioneve shëndetësore në vend i është dashur të presin 11 ditë për të marrë informacione nëse në 30 mostrat e dërguara në një laborator në Berlin është i pranishëm varianti i ri i COVID-19. Më 29 janar është bërë e ditur se 3 mostra kanë rezultuar pozitive me variantin e ri të Britanisë së Madhe, derisa nuk dihet edhe sa qytetarë tjerë janë të infektuar me këtë variant, pasi vendi nuk mund të detektoj mutacionet e reja, ndërsa verifikimi i tyre jashtë vendit po merr kohë. Derisa vaksinimi i qytetarëve po shihet shumë i rëndësishëm për parandalimin e përhapjes së varianteve të reja të koronavirusit, në shkurt vendi pritet të furnizohet me vetëm 3 për qind të vaksinave kundër COVID-19.

Tre raste të infektuara me variantin anglez të koronavirusit janë konfirmuar së fundmi në Kosovë, raporton Gazeta Express.

Derisa ky variant i ri i COVID-19 thuhet të jetë për 70 për qind më i transmetueshëm, Kosova mund ta ketë të vështirë parandalimin e përhapjes së tij. Kjo pasi që vendi ende nuk është furnizuar me asnjë dozë të vaksinave, ndërsa dozat e para që do të vijnë në muajin shkurt, pritet të jenë vetëm për 3 për qind të popullsisë.

Reklama e sponzorizuar

Zëdhënës në Aleancën e Vaksinave Gavi kanë thënë për Express, se në muajin shkurt furnizimi me vaksina do të bëhet vetëm për 3 për qind të popullsisë.

Ndërsa, deri në fund të vitit ata kanë thënë se do ta furnizojnë me vaksina 20 për qind të popullsisë në vend.

“Qëllimi i COVAX është të fillojë shpërndarjen e vaksinave në vendet më të përgatitura që në fillim të shkurtit, me këstin e parë, mjaftueshëm për të mbrojtur 3% të popullsisë të secilës ekonomi pjesëmarrëse, duke u mbështetur në qëllimin tonë për të mbrojtur të paktën 20% e popullsisë deri në fund të vitit 2021”, është thënë nga kjo aleancë.

Ndërsa, se sa efektive mund të jetë vaksina e COVAX kundër varianteve të reja të koronavirusit, nga kjo aleancë nuk kanë pranuar të japin informacione, duke thënë që këto informata të merren nga Organizata Botërore e Shëndetësisë.

Në anën tjetër,  derisa në vend nuk mund të detektohet ndonjë variant tjetër i koronavirusit, disa mostra tjera pritet të dërgohen për verifikim jashtë vendit.

Një gjë e tillë është bërë e ditur për gazetën nga Instituti Kombëtar i Shëndetit Publik, ndonëse nuk është dhënë ndonjë datë se kur do të dërgohen këto mostra në Berlin.

Përndryshe, derisa variante të reja të koronavirusit kanë filluar të përhapen në shumë shtete, përfshirë këtu edhe në rajon, Kosova nuk ka ashpërsuar masat ndaj tyre.

Nga Ministria e Shëndetësisë kanë thënë se gjendja me pandeminë dhe mutacionet e reja është duke u përcjellur dhe se masat që do të merren do të varen nga situata epidemiologjike në vend dhe në rajon.

Kurse, Instituti Kombëtar i Shëndetit Publik ka dalur sot me një thirrje për qytetarët, të cilëve u ka kërkuar që të qëndrojnë në shtëpi dhe të dalin vetëm për nevoja të domosdoshme, të ndalojnë takimet me njerëz me të cilët nuk jetojnë në bashkësi, të ndalojnë tubimet, të respektojnë masat kufizuese në aktivitete publike e të kufizojnë punën për veprimtaritë jo-esenciale.