I dënuari bëhet ambasador në Riad, i suspenduari konsull në Zarë

Për një të dënuar dhe një tjetër të suspenduar, autoritetet më të larta shtetërore kanë marrë vendim këtë javë që të vihen në krye të dy prej misioneve që Kosova i ka jashtë vendit. Beqir Ismaili është dërguar në krye të Ambasadës në Riad, kurse Esat Brajshori në krye të Konsullatës në Zarë, shkruan sot Koha Ditore.

Vendimin për Ismailin e ka firmosur të hënën Behgjet Pacolli, ministër i Punëve të Jashtme. E ka bërë këtë, diku një muaj pasi për të “Koha Ditore” ka raportuar se është dënuar për plagjiaturë nga një gjykatë në Egjipt.

“Z. Beqir Ismaili lirohet nga detyra e drejtorit të Përgjithshëm të Akademisë Diplomatike”, thuhet në vendimin e Pacollit, një kopje të të cilit e ka siguruar gazeta.“Z. Beqir Ismaili, nga pozita e tij në Ministrinë e Punëve të Jashtme, dërgohet si i ngarkuar me punë të përkohshme në misionin diplomatik të Republikës së Kosovës në Riad/Arabia Saudite”, vijohet më tej dhe saktësohet se detyra e re do të nisë më 15 korrik.

Reklama e sponzorizuar

Në Ministri nuk kanë thënë zyrtarisht se largimi nga Akademia është pasojë e dënimit për plagjiaturë.